李靖筠贏新人獎以靚取勝


本年度樂壇成績表陸續發表,《新城勁爆頒獎禮2019》昨日率先頒發三個新人獎項,勇奪「勁爆新人」之一的李靖筠,信心爆棚以「靚」作為勝出原因,相當爆笑!打氣嘉賓陳柏宇則自嘲「老嘢」,少留意新人表現,眼中只有愛女。

眾新人出席電台活動,期間頒發頒獎禮其中三個新人獎、共有五名得主,「勁爆新人」得獎者為李靖筠、林穎彤及陳凱詠,施匡翹獲頒「勁爆劇場版歌曲」,林家謙則奪得「勁爆獨立音樂人」。

李靖筠於頒獎前已直認有信心,認為攞獎是一個肯定,說到優勝之處,她說:「啲歌舒服過佢哋,同埋我靚啲!攞到獎對公司都有交代,同事喺背後付出好多,請食飯呢啲係基本,或者再開Party慶祝。」可會覺得於商場頒發獎項是美中不足?她反指感覺更深刻、特別。

陳凱詠如打強心針

而環球歌手陳凱詠興奮指是今年首個獎項,猶如一支強心針,她說:「想自己再叻啲、寫多啲好歌,再用成績去報答同事。」

陳柏宇、許廷鏗及林奕匡則以打氣嘉賓身份現身,陳柏宇坦言一年比一年少留意新人,自嘲「老嘢」,做完活動即閃:「行埋去班新人度會唔好意思,今年新人係我個女!」有甚麼說話去勉勵後輩?他抵死反問:「佢哋條路好崎嶇咩?崎嶇可以係一種心態,唔係一條路,新人喺調整心態好重要,同期嘅人會有比你風光,但就唔好比較。」

許廷鏗堅持唔認老

至於許廷鏗笑言「不認老」是做歌手的基本心態:「每年都當自己係新人,咁樣係最幸福。」

另外,原定到場的孫慧雪因病缺席,她於社交網站上載X光片交代病情,指因食飯時骾雞骨致刮傷喉嚨,就連說話也覺痛,日前的音樂會都是靠意志力完成。